Yengil vazn toifasida Ultimate Fighting Championship (UFC) promousheni sobiq chempioni Habib Nurmagomedov aralash jang san’ati (MMA) sportidagi faoliyatini yakunladi. Bu haqda Nurmagomedovga yaqin bo‘lgan uchta manba ma’lum qilgan.

“Habib MMA sohasidan nafaqaga chiqdi. U endi murabbiylik ham qilmaydi, yig‘inda jamoa bilan birga bo‘lmaydi. Bu oila bilan ko‘proq vaqt o‘tkazish maqsadida amalga oshirilmoqda”, – deyiladi xabarda.

Qayd etish mumkin, Nurmagomedov 34 yoshda va 2020-yilning oktyabrida UFC’dagi faoliyatini yakunlagan. U karyerasi davomida 29 jang o‘tkazib, ularning barchasida g‘alaba qozongan. So‘nggi chempionlik jangi otasining vafotidan so‘ng o‘tkazilgan va unda Habib ikkinchi raunddayoq amerikalik Jastin Getjini mag‘lub etgan va jangdan so‘ng faoliyati yakunlanganini ma’lum qilgan. U ushbu qarorini onasiga bergan va’dasi bilan izohlagan edi.

Rossiyalik jangchi 2018-yilning 7-aprel kuni amerikalik El Yakvintani mag‘lubiyatga uchratib, UFC chempioni bo‘lgan. So‘ngra kamarini irlandiyalik Konor Makgregor, amerikalik Dastin Porye va Jastin Getjiga qarshi uch marta himoya qilgan. 2022-yil mart oyida dog‘istonlik sportchi UFC shon-sharaf zaliga kiritildi.

Bundan tashqari, joriy yil Habib uchun murabbiy sifatida muvaffaqqiyatli o‘tdi. Uning jamoadoshi Islam Maxachev aynan uning vaznida UFC chempionlik kamarini qo‘lga kiritdi. Shuningdek, uning jiyani Usman Nurmagomedov esa Bellator chempioni bo‘ldi. Shu sababdan ham “Burgut” o‘z ustozi Xavyer Mendes bilan birgalikda 2022-yilning eng yaxshi MMA murabbiyi deb topildi.

Eslatib o‘tamiz, yangilik rasman tasdiqlanmagan bo‘lsa-da, Habib o‘z fan-klubi tomonidan e’lon qilingan xabarni o‘z sahifasida “repost” qilgan.

• Habib Nurmagomedov
• Sport
• UFC