Shavkat Mirziyoyevning 16-fevral kungi farmoni bilan o‘zgarishlar amalga oshirildi. Bu haqda prezident matbuot xizmati xabar berdi.

Ma’lum qilinishicha, Hilola O‘ktamovna Umarova O‘zbekiston Respublikasi maktabgacha va maktab ta’limi vazirining pedagogik ta’limni rivojlantirish masalalari bo‘yicha o‘rinbosari – Nizomiy nomidagi O‘zbekiston milliy pedagogika universiteti rektori lavozimiga tayinlangan. Shu munosabat bilan u Prezident administratsiyasi rahbarining ta’limni isloh qilish bo‘yicha o‘rinbosari lavozimidan ozod etilgan.

Hilola Umarova 1988-yil 9-avgust sanasida Germaniyaning Vaymer shahrida tug‘ilgan. U 2010-yil Jahon iqtisodiyoti va diplomatiya universitetining bakalavr bosqichi, 2013-yil esa ushbu universitetning magistratura bosqichini tamomlagan.

Faoliyati davomida Toshkent shahridagi Inha universitetining faol tadbirkorlik, innovatsion g‘oyalar va texnologiyalarni qo‘llab-quvvatlash masalalari bo‘yicha bosh menejeri lavozimida ishlagan. 2020-yil oktyabrda Prezident, ijod va ixtisoslashtirilgan maktablarni rivojlantirish agentligiga rahbar etib tayinlangan.

U 2022-yil dekabridan maktabgacha va maktab ta’limi vaziri sifatida ishlagan. 2025-yil iyul oyida prezident farmoni bilan   Prezident administratsiyasi rahbarining ta’limni isloh qilish bo‘yicha o‘rinbosari lavozimiga tayinlangan. Umarova “O‘zbekiston belgisi” ko‘krak nishoni bilan taqdirlangan.