O‘zbekistonda xizmat ko‘rsatgan artist, taniqli aktrisa Dono Boboxonova 80 yoshida vafot etdi. U milliy sahna san’ati rivojiga ulkan hissa qo‘shib, betakror obrazlari bilan tomoshabinlar qalbidan joy olgan edi.

Aktrisa 1946-yil 20-noyabrda Qozog‘istonda tavallud topgan. Toshkent teatr va rassomlik institutini tamomlab, ijodiy faoliyatini “Yosh gvardiyachilar” teatrida boshlagan. 1996-yilda unga “Oʻzbekiston Respublikasida xizmat koʻrsatgan artist” faxriy unvoni berilgan.

U nafaqat teatrda, balki kino san’atida ham yorqin rollari bilan tanilgan. Jumladan, “Bozor ko‘rmagan yigit” filmida ona, “Arazlasang, o‘laman”da qaynona, “Chol va nabira”da Sobira, “Tilim qursin”da sovchi kabi obrazlarni mahorat bilan ijro etgan.

Dono Boboxonova katta oila egasi bo‘lib, to‘qqiz nabira va to‘rt evaraning mehribon buvisi edi. Uning ijodiy merosi o‘zbek san’atida muhim o‘rin tutadi.