Sport ozuqasi sifatida ko‘rsatilgan qo‘shimchalar ichidan qiymati 350 ming dollarga teng sintetik narkotik modda fosh etildi.

Toshkent xalqaro aeroportida bojxona xodimlari sintetik narkotiklarni biologik faol qo‘shimcha ko‘rinishida olib kirishga uringan qo‘shni davlat fuqarosini to‘xtatib qolishdi.

“Yashil yo‘lak” orqali harakatlangan yo‘lovchining sumkasidan sportchilar uchun mo‘ljallangan 2 quti qo‘shimcha topildi. Qadoqqa ko‘ra, har birida jami 760 dona oq rangli kapsula bo‘lishi kerak edi. Ammo tekshiruv davomida kapsulalar soni 920 donani tashkil etgani, ularning rangi esa oq emas, balki sariq va qizil ekani aniqlandi. Bu esa mahsulot qo‘lbola tarzda qadoqlanganini ko‘rsatdi.

Markaziy bojxona laboratoriyasi xulosasiga ko‘ra, kapsulalar ichiga “Alfa-PVP” turidagi sintetik narkotik modda joylangani ma’lum bo‘ldi. Ushbu moddaning qora bozordagi qiymati 350 ming dollargacha baholanmoqda.

Shuningdek, “Toshkent AERO” Ixtisoslashtirilgan bojxona kompleksi tezkor tuzilmalari tomonidan tadbir Yuqori Chirchiq tumanida davom ettirilib, yo‘lovchi tomonidan “zakladka” usulida yashirilgan manzil ham aniqlangan. Pana hudud ko‘zdan kechirilganida, 1 dona polietilen paket ko‘mib qo‘yilgani fosh bo‘ldi. Unda esa bir necha bo‘laklarda og‘irligi taxminan yarim kilogram “gashish” moddasi borligi aniqlandi. Mazkur holat yuzasidan bojxona organlari tomonidan jinoyat ishi qo‘zg‘atilgan.

• Aeroport
• Bojxona
• Giyohvandlik
• Toshkent