O‘zbekiston Respublikasi Bosh vazirining o‘rinbosari – investitsiyalar va tashqi savdo vaziri Sardor Umurzakov ta’lim va sog‘liqni saqlash sohalaridagi hamkorlikni kengaytirish yuzasidan Hindistonning yetakchi universitetlari rahbarlari bilan videokonferensiya shaklida muzokaralar o‘tkazdi.

Videokonferensiyada 2019-yilda Toshkent shahrida o‘z filialini ochgan AMITI universiteti, Andijonda ham 2019-yildan beri filiali faoliyat yuritayotgan Sharda Group va shu yilning iyul oyidan Jizzaxda o‘z filialini tashkil etgan Sambhram Group rahbariyati ishtirok etgan.

Muzokaralar chog‘ida ko‘rib chiqilayotgan yo‘nalishlarda o‘zaro manfaatli ko‘p qirrali sheriklik borasida salmoqli salohiyat mavjudligi, shuningdek, Hindiston ta’lim muassasalari O‘zbekistondagi faoliyatini kengaytirishga qiziqayotganligi qayd etilgan.

Xususan, Hindiston universitetlarining O‘zbekistondagi filiallarida tibbiyot fakultetlari va tegishli klinikalarni ochish istiqbollari ko‘rib chiqilgan. Hindiston tomoni jarrohlik, ortopediya, radiologiya, dermatologiya, oftalmologiya, pediatriya va psixiatriya kabi sohalarda sog‘liqni saqlash sohasida mutaxassislarni tayyorlashga qiziqish bildirgan. Talabalar keyinchalik O‘zbekistonning ixtisoslashtirilgan muassasalarida ish bilan ta’minlanadi. 

Bundan tashqari, O‘zbekistonda Hindistonning ilg‘or texnologiyalari asosida xaridorgir dori-darmon vositalarini ishlab chiqarishni yo‘lga qo‘yish imkoniyatlari alohida muhokama qilingan. Shuningdek, Hindistonning boshqa bir qator kompaniya va universitetlari mamlakatimizda oliy o‘quv yurtlari va tibbiyot markazlarini tashkil etishga qiziqish bildirgani muhokama qilingan.

O‘zbekiston tomoni qo‘shma loyihalar va o‘quv dasturlarini joriy etishda har tomonlama amaliy yordam ko‘rsatishga tayyorligini bildirib o‘tgan. O‘zbekistonning tegishli vazirlik va idoralarini jalb qilgan holda istiqbolli tashabbuslarni ishlab chiqish bo‘yicha navbatdagi tadbirlar hamda o‘zaro hamkorlik olib borishning shakli belgilangani qayd etilgan. 

• Hindiston
• Tibbiyot