Hindiston va Bangladeshda kuchli suv toshqini oqibatida 57 kishi halok bo‘lgani aytilmoqda. Ikki millionga yaqin mahalliy aholi esa boshpanasiz qolgan. O‘n minglab odamlar elektr va ichimlik suvisiz aziyat chekmoqda. 

Tabiiy ofat oqibatlari haqidagi ma’lumotlarni “Al-Jazeera” telekanali mahalliy amaldorlar bayonotiga tayanib xabar bermoqda. 

Ta’kidlanishicha, Hindiston shimoli-sharqidagi toshqin suvlar Barak daryosidagi katta qirg‘oqni yorib o‘tib, Bangladeshning Silxet viloyatidagi kamida 100 qishloqni suv ostida qoldirgan. Mahalliy rasmiylarga ko‘ra, vayron bo‘lgan qirg‘oqni suv sathi tushganidan keyingina tiklash mumkin bo‘ladi.

Shuningdek, 50 mingga yaqin aholi elektr va ichimlik suvisiz qolmoqda. Ayrim aholi suv bosgan yo‘llarda baliq tutayotganini ko‘rishgan.

Mahalliy favqulodda xizmatlar ma’lumotlariga ko‘ra, hafta davomida Hindistonda momaqaldiroq, suv toshqini va ko‘chkilar bir necha o‘nlab odamlarning hayotiga zomin bo‘ldi. Bangladesh bilan chegaradosh Assam shtatida kamida 14 kishi unsurlar qurboniga aylangan. Shtat rasmiylarining aytishicha, kuchli yomg‘irlar 3200 ga yaqin hududlardagi qishloq xo‘jaligi yerlarini suv bosgan va minglab uylarga zarar yetkazgan. 

Daryolar sathi ko‘tarilib, ko‘plab yerlar hali ham suv ostida qolayotgani sababli 90 mingga yaqin odam vaqtinchalik boshpanalarga evakuatsiya qilingan. Evakuatsiya qilingan o‘nlab oilalar hukumatdan yordamga muhtoj ekanini aytishgan. 

“Biz kelajagimizdan xavotirdamiz. Nima qilishimizni bilmaymiz. Boshqa umida qolmadi deb o‘ylaymiz. Chorvamizni tashlab ketdik, oziq-ovqatimiz yetishmayapti. Biz bu yerda bir qancha vaqt bo‘ldik va hali ham yordam kutyapmiz”, deydi mahalliy aholidan biri Al-Jazira telekanaliga bergan intervyusida.

Mutaxassislarning qayd etishicha, iqlim o‘zgarishi natijasida mintaqada va butun dunyoda ekstremal ob-havo hodisalari yuzaga kelishi ehtimoli ortadi.

• Bangladesh
• Hindiston
• Jahon
• suv_toshqini