Hindiston ommaviy axborot vositalarida ushbu davlatning Bihar shtatida hibsda ushlab turilgan o‘zbekistonlik ayollar haqida maʼlumotlar tarqatilmoqda deya xabar berdi “Dunyo”. O‘zbekistonning Dehlidagi elchixonasi ushbu masalaga oydinlik kiritish maqsadida bir qator chora-tadbirlar ko‘rdi.

Maʼlum bo‘lishicha, o‘zbekistonlik uch nafar ayol 2021-yil oktyabr oyida Hindiston-Nepal chegarasining Bihar shtatidagi hududidan noqonuniy tarzda o‘tayotganda qo‘lga olingan. Shundan so‘ng, Arariya shahridagi birinchi instansiya sudi 2022-yil avgust oyida O‘zbekiston fuqarolarini mamlakat hududidan chiqarib yuborish (deportatsiya qilish) to‘g‘risida chiqargan qaroriga qaramasdan turli byurokratik to‘siqlar va yurisdiksiyaning murakkabligi sababli ular haligacha hibsda ushlab turilgani aniqlandi.

"Afsus bilan qayd etish joizki, fuqarolarimiz yoki ularning yaqinlari tomonidan o‘z vaqtida ushbu masala yuzasidan tezkor konsullik-huquqiy yordam ko‘rsatish bo‘yicha murojaat qilinmagan", – deyiladi xabarda.

Qayd etilishicha, elchixona tomonidan Hindiston Tashqi ishlar vazirligi va Bihar shtatining tegishli idoralari bilan mazkur holat yuzasidan rasmiy muloqotlar o‘tkazilmoqda. Hozirda vaziyat nazoratga olingan hamda o‘zbekistonlik ayollarni mamlakatga qaytarish bo‘yicha tegishli choralar ko‘rilmoqda.

• Hindiston
• Qamoqxona