Hindistonning Odisha shtatida yuz bergan poyezd to‘qnashuvi oqibatida halok bo‘lganlar soni 288 kishiga yetdi. Bu haqda Frans Press nashri shtat yong‘in xavfsizligi xizmati boshlig‘i Sudxansha Sarangiga tayanib, xabar bermoqda.

Qayd etilishicha, poyezdlar Balasore shahri yaqinida to‘qnashgan. Temir yo‘l idoralarining yangilangan ma’lumotlariga ko‘ra, Kalkuttadan Chennayga ketayotgan yo‘lovchi poyezdining 10-12 vagonlari yuk poyezdi bilan to‘qnashuvdan so‘ng relsdan chiqib ketgan va qarama-qarshi yo‘lni to‘sib qo‘ygan. Biroz vaqt o‘tgach, ularga yana bir yo‘lovchi poyezdi kelib urilgan, natijada ichida odamlar bo‘lgan yana uch-to‘rtta vagon relsdan chiqib ketgan.

Jabrlanganlarga yordam berish uchun yuzlab xizmatchilar jalb qilingan. Ko‘plab yo‘lovchilar ag‘darilgan vagonlar ostida qolgan bo‘lishi mumkin.

Qutqaruv operatsiyasi qizg‘in davom etmoqda, Balasore va uning atrofidagi shifoxonalar yaradorlarni qabul qilishga hozirlik ko‘rmoqda.

• Hindiston
• Poyezd