Maxarashtra shtatida poyezdda yong‘in sodir bo‘lgani haqidagi mish-mish yo‘lovchilar orasida vahima uyg‘otgan va ulardan 12 nafari vagonlarni tark etayotgan vaqtda yonma-yon ketayotgan boshqa bir poyezdning yo‘nalishiga chiqib ketgan va halok bo‘lgan.

Baxtsiz hodisa Mumbaydan 400 km uzoqlikda sodir bo‘lgan. “Dastlabki ma’lumotlarga ko‘ra, Pushpak Express vagonlaridan birida chaqnashlar paydo bo‘lgan va ba’zi yo‘lovchilar vahimaga tushgan. Ular favqulodda to‘xtash dastagini tortishgan, ba’zilari esa relslarga sakrab tushishgan”, – deya izoh bergan temiryo‘l ma’muriyati.

Shundan so‘ng, voqea joyiga avariya-qutqaruv poyezdi yuborilgan. Jalgaon politsiyasi vakili jurnalistlarga poyezd g‘ildiraklari ostida 12 kishi halok bo‘lganligi va yana bir necha kishi yaralanganligi haqida xabar bergan.

“Barcha shtat hokimiyatlari temir yo‘l ma’muriyati bilan kelishilgan holda ishlaydi va jabrlanganlarni davolash uchun zarur choralar ko‘riladi”, – degan Maxarashtra shtati bosh vaziri Devendra Fadnavis.

• Halokat
• Hindiston
• Poyezd
• yo‘lovchi