Prezident Shavkat Mirziyoyev 8-noyabr kuni davlat obyektlarini xususiylashtirish masalalari boʻyicha yigʻilish oʻtkazdi. Bu haqda Prezident matbuot xizmati xabar berdi.

Unda iqtisodiyotda davlat ishtiroki kamaytirilib, xususiy tadbirkorlik rivojiga keng oʻrin berilayotgani qayd etilib, 2021-2022-yillarda davlat ulushi boʻlgan korxonalar sonini kamida 3 barobar qisqartirish rejalashtirilgani, joriy yilda esa 4 trillion 500 milliard soʻmlik 619 ta davlat aktivi sotilgan maʼlum qilindi.

Shuningdek, yigʻilishda davlat korxonalarini transformatsiya qilish va xususiylashtirish jarayonlarini tezlashtirish boʻyicha amalga oshirilishi lozim boʻlgan chora-tadbirlar muhokama qilindi. 

Davlat rahbari xususiylashtirishning yangi usullarini joriy etish va uning barcha bosqichlarida ochiq-oshkoralikni taʼminlash eng asosiy masala ekanini taʼkidladi.

Xususiylashtirilayotgan korxonalarning moliyaviy barqarorligi va investitsion jozibadorligini oshirish muhimligi qayd etildi. Shu maqsadda, nufuzli xorijiy konsultantlarni jalb qilgan holda, yirik tarmoq korxonalarini xususiylashtirish strategiyasini ishlab chiqish vazifasi qoʻyildi.

Shu oʻrinda, strategik korxonalar boshqaruviga xalqaro malakaga ega menejerlarni jalb qilish zarurligi aytildi. Qiymati 10 million dollardan yuqori boʻlgan aktivlarni sotish jarayonida takliflarni qabul qilish va ularni baholash mustaqil xorijiy konsultant tomonidan amalga oshirilishi belgilandi.

Keltirilishicha, kelgusi yillarda 32 ta yirik davlat aktivini sotish, “Oʻzsanoatqurilishbank”ni xususiylashtirish, davlat korxonalarining 368 ta nosohaviy va samarasiz aktivlarini savdoga chiqarish rejalashtirilgan.

Taʼkidlanishicha, hududlarda 770 ta aktiv sotishga tayyorlangan. Bular orqali byudjetga qariyb 10 trillion soʻm tushum taʼminlanishi koʻzda tutilgan. Mutasaddilarga shu boradagi ishlarni jadallashtirish boʻyicha koʻrsatmalar berildi.

Shavkat Mirziyoyev davlat korxonalariga strategik investorlarni jalb qilish, faqat mavjud quvvatlarni ishlatish bilan cheklanmasdan, korxonalar faoliyatini kengaytirish zarurligini taʼkidladi.

Misol uchun, “Navoiyazot” aksiyadorlik jamiyati negizida uchta alohida korxona tashkil etgan holda, “kimyo sanoati klasteri” faoliyati yoʻlga qoʻyilmoqda. Bu klaster infratuzilmasini boshqarish uchun tajribali xususiy operator jalb qilinadi.

Prezident investorlar sarmoya kiritish bilan birga yangi loyihalar taklif qilishi, zamonaviy bilim va texnologiyalarni olib kelishi muhimligini taʼkidladi.

Mutasaddilarga, shularni inobatga olgan holda, 2022-yil uchun xususiylashtirish dasturini ishlab chiqish vazifasi qoʻyildi.

• Mirziyoyev
• Prezident