AQShning Chikago shahrida Xalqaro Boks federatsiyasi (IBF)ning chempionlar ishtirokidagi tadbiri boʻlib oʻtdi.

IBF tashkiloti barcha vazn toifalaridagi chempionlarni bir joyda jamladi. Taklif etilganlar orasida oʻzbekistonlik bokschi Murodjon Ahmadaliyev ham bor.

Oʻz kamarini uch marotaba muvaffaqiyatli himoya qilgan charm qoʻlqop ustasi chempionlar gala tadbirida ishtirok etdi.

IBF Ahmadaliyevga barcha kamar sohiblari qatori esdalik uchun chempionlik uzugi sovgʻa qildi.    

“Taklif va sovgʻa uchun IBF tashkilotiga katta rahmat. Meni esdalik sovgʻasiga munosib koʻrishgani uchun tashakkur izhor qilaman.

Tez orada oʻz kamarlarimni qaytarib olaman. Meni hamisha, har qanday holatda ham qoʻllab-quvvatlab kelayotgan jamoamga minnatdorlik izhor etaman. Yangi choʻqqilarni zabt etish uchun harakatni davom ettiramiz”, – deb fikr bildirgan Ahmadaliyev.

• Boks
• IBF
• Murodjon Ahmadaliyev