Portugaliyalik mashhur futbolchi Krishtianu Ronaldu oʻzining rasmiy YouTube sahifasini ochdi. U 15 soat davomida 13 milliondan ortiq obunachi yigʻdi va koʻrsatkich yanada oshib bormoqda.

Krishtiano 21-avgust kuni YouTube’da rasmiy sahifa ochganini e’lon qildi va unga videolar joylashni boshladi. Hozircha kanalda 19 ta video bor. 5 karra “Oltin toʻp” sohibi oʻz oilasi bilan qiziqarli videolar tayyorlamoqda. Masalan, kanalda hozircha eng koʻp koʻrilgan (9 mln) videoda Ronalda sevgilisi Jorjiniya bilan oʻzlari haqida savol-javob oʻyinini oʻynashgan.

“Real Madrid” sobiq futbolchisi 1 million obunachi yigʻishi uchun 2 soatdan kamroq vaqt ketdi va YouTube allaqachon ushbu dovondan oʻtgan blogerlarga yuboradigan sovgʻasini Krishtianuga yetkazdi.

Ronaldu 1 millionlik oltin tugmachani “unpacking” qilayotgani va bunga bolalarning reaksiyasi koʻrsatilgan videoni ham kanaliga joyladi.

Ma’lumot uchun, futbolchi Instagram ijtimoiy tarmogʻida dunyodagi eng koʻp obunachiga ega foydalanuvchi hisoblanadi. Uni Instagram’da 636 million kishi kuzatadi.

• Ronaldu