Bugun Toshkentda ogʻir atletika boʻyicha kattalar oʻrtasidagi jahon chempionati boshlandi. Oʻzbekistonda ilk bor oʻtkazilayotgan musobaqada 80 dan ortiq mamlakatdan 500 nafarga yaqin sportchi ishtirok etmoqda. Toshkent vaqti bilan 16:00 da musobaqaning tantanali ochilish marosimi boʻlib oʻtdi.

Marosimda Oʻzbekiston Respublikasi Bosh vazirining oʻrinbosari, Turizm va sport vaziri Aziz Abduhakimov, MOQ rahbari Rustam Shoabdurahmonov, Oʻzbekiston Respublikasi Qurilish vaziri, Oʻzbekiston ogʻir atletika federatsiyasi raisi Botir Zokirov, Oʻzbekiston ogʻir atletika federatsiyasi raisining birinchi oʻrinbosari, Osiyo ogʻir atletika federatsiyasi vitse-prezidenti Shahrullo Mahmudov, Xalqaro ogʻir atletika federatsiyasi rahbarlari, bir qancha muxlislar hamda musobaqada qatnashayotgan delegatsiyalar ishtirok etishdi.

Marosim avvalida Prezidentimiz va hukumatimiz tomonidan sportga qaratilayotgan yuksak eʼtibor haqidagi videorolik mehmonlarga taqdim qilindi. Shundan soʻng sahnalashtirilgan turli badiiy chiqishlar yigʻilganlar eʼtiboriga havola etildi. Shuningdek, Oʻzbekistonda xizmat koʻrsatgan artist Shukurullo Isroilov, Oʻzbekiston va Qoraqalpogʻiston xalq artisti Jenisbek Piyazov, va “Sitora” guruhi ishtirokidagi chiqish yigʻilganlarga yuqori kayfiyat ulashdi.

Tadbir davomida Xalqaro ogʻir atletika federatsiyasi prezidenti Maykl Irani musobaqa yuqori saviyada tashkillashtirilganiga alohida toʻxtalib, Oʻzbekiston Respublikasi Prezidenti Shavkat Mirziyoyevga ushbu musobaqani yuqori saviyada tashkillashtirishda bosh boʻlgani uchun federatsiya nomidan minnatdorchilik bildirdi. Shuningdek, Turizm va sport vazirligi, Milliy Olimpiya qoʻmitasi, Oʻzbekiston ogʻir atletika federatsiyasi tomonidan ham tashkiliy ishlar yuqori saviyada amalga oshirilgani taʼkidlandi.

Oʻz navbatida, mamlakatimiz nomidan Aziz Abduhakimov soʻzga chiqib, musobaqa ishtirokchilariga samimiy qutlovlarini yoʻllagan holda, Oʻzbek sportchilarining xalqaro maydonda katta yutuqlarga erishib kelishayotgani taʼkidlandi.

Birgina ogʻir atletika misolida soʻnggi ikki Olimpiya oʻyinlarida vakillarimiz oltin medalni qoʻlga kiritayotgani, yaqinda Saudiya Arabistonida oʻtgan oʻsmirlar oʻrtasidagi jahon chempionatida yoshlarimiz kuchli uchlikdan oʻrin olgani eslandi.

Shundan soʻng, Aziz Abduhakimov musobaqani rasman ochiq deb eʼlon qildi va Oʻzbekiston Respublikasi davlat madhiyasi yangradi.

Shuning bilan musobaqaning tantanali ochilish marosimi oʻz yakuniga yetdi.

Qayd etish mumkin, ushbu dunyo birinchiligida 14 nafar oʻzbekistonlik atlet yurtimiz sharafini himoya qiladi. Ular orasida Ruslan Nurudinov, Akbar Joʻrayev, Adham Ergashev, Kumushxon Fayzullayeva, Doston Yoqubov kabi tajribali sportchilar ham bor. Quyida vakillarimiz ishtiroki bilan tanishib chiqing:

Ayollar

-49 kg. Zuhra Otajonova — 19:00 (8-dekabr)

-55 kg. Jamila Panfilova — 16:00 (9-dekabr)

-71 kg. Kumushxon Fayzullayeva — 19:00 (13-dekabr)

-87 kg: Tursunoy Jabborova — 19:00 (16-dekabr)

Erkaklar

-67 kg. Adhamjon Ergashev va Doston Yoqubov — 16:00 (10-dekabr)

-81 kg. Muhammadqodir Toshtemirov 19:00 (12-dekabr)

-89 kg. Otaxon Imomov — 10:30 (13-dekabr) (В guruh)

-89 kg. Sarvarbek Zafarjonov — 16:00 (13-dekabr)

-96 kg. Hojiakbar Olimov — 08:30 (14.12) (S guruhi)

-96 kg. Qurbonmurod Namozov — 13:00 (15-dekabr)

-109 kg. Ruslan Nurudinov va Akbar Joʻrayev — 16:00 (16-dekabr)

+109 kg: Mirhosil Mirzaboyev — 08:00 (17-dekabr) (C guruh).

Bellashuvlar “Yunusobod sport majmuasi”da boʻlib oʻtmoqda.

Suratlar muallifi va tayyorlovchi Dadajon Foziljonov.

• O‘zbekiston
• Sport