Ma’lumotlarga ko‘ra, milliarder Ilon Mask Xitoyga o‘zi boshqariladigan avtomobillar bilan bog‘liq muammolarni muhokama qilish uchun borgan. Bu haqda “Reuters” xabar bermoqda.

“Tesla bosh direktori Ilon Mask yakshanba kuni kutilmagan tashrif bilan Pekinga uchib ketdi”, – deyiladi xabarda.

Agentlik maʼlumotlariga koʻra, tadbirkor Xitoyda avtomobillar uchun dasturiy taʼminotni joylashtirish masalalarini muhokama qilish va oʻz-oʻzini boshqarish algoritmlarini ishlab chiqish, mamlakatda toʻplangan maʼlumotlarni uzatish uchun ruxsat olish maqsadida Xitoyning yuqori lavozimli amaldorlari bilan muzokaralar olib borish niyatida.

24-aprel kuni The Economic Times Mask Tesla’ning yangi zavodlarini qurishni istamasligini, uning o‘rniga mavjud zavodlarda ishlab chiqarishni ko‘paytirishni tanlaganini ma’lum qildi.

Qayd etilishicha, 2024-yilda amerikalik elektromobillar ishlab chiqaruvchisi avtomobillar ishlab chiqarishni 2023-yilga nisbatan 1,5 barobarga ko‘paytirib, qariyb 3 million donaga yetkazishni maqsad qilmoqda.

• Ilon_Mask
• Tesla
• Xitoy