AQSh Qimmatli qog‘ozlar va birjalar komissiyasi Ilon Maskni 2022-yilda Twitter’ning katta ulushini sotib olganini kech oshkor qilgani uchun sudga berdi. Bu haqda Reuters xabar bermoqda.

Milliarder qimmatli qog‘ozlar bo‘yicha federal qonunni buzgani aytilmoqda. Sababi u Twitter aksiyalarining dastlabki 5 foizini sotib olganini e’lon qilishni 11 kunga kechiktirgan.

Qoidalarga ko‘ra, investorlar 10 kalendar kun ichida 5 foiz aksiyaga egalik qilish chegarasini kesib o‘tgani haqida xabar berishi shart. Mask uchun bu muddat 2022-yil 24-martda tugagan.

Milliarder 2022-yil 4-aprelgacha o‘z xaridlari haqida xabar bermagan. Lekin bu paytda u kompaniya aksiyalarining 9,2 foiziga egalik qilgandi. SEC shu vaqt oralig‘ida u Twitter aksiyalarini sun’iy ravishda pasaytirilgan narxlarda 500 million dollardan ortiqqa sotib olgani, bu esa boshqa investorlarga zarar keltirganini aytdi.

• AQSh
• Ilon_Mask