Ilon Maskning Twitterʼdagi obunachilari soni 100 million kishidan oshdi. U soʻnggi hafta ichida oʻz sahifasiga hech narsa joylamagan boʻlishiga qaramay, kuzatuvchilar soni kundan kunga oshib bormoqda.

Milliarderning sahifasiga yana 1,3 million kishi obuna boʻlsa, Mask ushbu platformadagi eng mashhur beshta shaxsdan biriga aylanadi va futbolchi Krishtianu Ronalduni ortda qoldirib ketadi.

2018-yilning boshlarida Maskning Twitterʼdagi obunachilari soni 18 million kishini tashkil etgan, milliarder platformani sotib olgani maʼlum boʻlganda esa uning sahifasidagi obunachilar soni 83 million kishidan oshgandi.

Taʼkidlash kerakki, Ilon Mask Twitterʼdan faqatgina muloqot platformasi sifatida foydalanmaydi. Uning yozgan tvitlari shu kunga qadar aksiyalar va kriptovalyuta narxlariga keskin taʼsir koʻrsatib kelgan. Maskning koka-kola ichimligi haqidagi soʻzlari esa platforma tarixidagi eng mashhur tvitlar reytingida ikkinchi oʻrinda turadi. Ushbu tvitga obunachilar tomonidan 4,5 millionta layk bosilgan.

• Ilon_Mask
• Twitter
• milliarderlar