Milliarder Ilon Maskning yoshlik yillaridagi sevgilisi Jennifer Gvinn tadbirkorning eski suratlari, uning sovgʻalari – taqinchoqlar va tabriknomalarni kimoshdi savdosiga qoʻydi. U milliarderga tegishli suratlarni uzoq yillar davomida saqlab kelgan, keyin esa oʻgʻlining oʻqish pulini toʻlash maqsadida buyumlarni sotib yuborishga qaror qilgan.

Gvinn va Ilon Mask Pensilvaniya universitetida tahsil olayotgan vaqtlari uchrashib yurishgan. Ularning munosabatlari bir yil davom etgan, bu vaqtda Gvinn boʻlgʻusi milliarderning onasi, uning yaqinlari bilan tanishish, Maskning elektromobillar haqidagi rejalaridan boxabar boʻlishga ulgurgan.

Gvinning aytishicha, Maskning kelgusida muvaffaqiyatga erishishini oʻsha vaqtlardayoq his qilgan. “Uning bor diqqat-eʼtibori oʻqishga qaratilgandi, oʻsha vaqtlardayoq elektromobillar haqida gapirardi. Rejalari katta edi”, – deydi Gvinn.

Jennifer va Ilonning munosabatlari 1995-yilda boʻlgʻusi milliarderning Kaliforniyaga koʻchib oʻtishi bilan yakun topgan. Jennifer uni koʻrish uchun Kaliforniyaga kelgan. Ilon esa qizga ajralishni taklif qilgan.

“Oradagi masofa uzoq edi, u telefon orqali suhbatlashishni yoqtirmasdi. Telefon orqali suhbatlashishni vaqtni behuda sarflash deb bilardi”, – deydi Jennifer.

Ilon Mask Jennifer bilan munosabatlariga nuqta qoʻygandan keyin oradan koʻp vaqt oʻtmay birinchi rafiqasi, kanadalik yozuvchi Jastin Maskka uylangan. Tadbirkor ayni vaqtda dunyodagi eng badavlat odam hisoblanadi. Uning umumiy boyligi miqdori 262.9 milliard AQSh dollarini tashkil etadi.

• Auksion
• Ilon_Mask
• mashhurlar
• milliarderlar