Prezident farmoniga ko‘ra, O‘zbekistonda imtiyozli toifaga kiruvchi shaxslar davlat hisobidan davolanadigan kasalliklar ro‘yxati 2025-yil 1-iyulga qadar qayta tasdiqlanadi.

“Respublikada sog‘liqni saqlash tizimini va aholiga tibbiy xizmat ko‘rsatish tamoyillarini takomillashtirish orqali sohani isloh qilishni izchil davom ettirish chora-tadbirlari to‘g‘risida”gi farmonda belgilanishicha, Iqtisodiyot va moliya vazirligi, Raqobatni rivojlantirish va iste’molchilar huquqlarini himoya qilish qo‘mitasi va Davlat tibbiy sug‘urtasi jamg‘armasi bilan kelishilgan holda davlat budjeti mablag‘lari hisobidan imtiyozli toifaga kiruvchi shaxslar davolanadigan kasalliklar ro‘yxati hamda bazaviy narxlarini kasalliklarni davolash yo‘nalishlari asosida barcha tibbiyot tashkilotlari uchun 2025-yil 1-iyulga qadar qayta tasdiqlashi lozim.

Prezidentning 2024-yil 5-sentyabrdagi “Davlat tibbiy sug‘urtasi mexanizmlarini joriy etishga oid chora-tadbirlar to‘g‘risida”gi qarorida bu sana 2025-yil 1-aprelgacha deb belgilangandi. Ushbu qarorga tegishli o‘zgartirish kiritiladi.

2026-yil 1-yanvardan boshlab quyidagilar davlat tibbiy sug‘urtasi mexanizmlari joriy etilgan hududlarda tuman (shahar) va hududiy darajadagi tibbiyot muassasalarida rejali statsionar tibbiy yordamni elektron navbat asosida bepul olish huquqiga ega bo‘ladi:

– jismoniy shaxslardan olinadigan daromad solig‘i yoki ijtimoiy soliq to‘lovchilar;

– Soliq kodeksiga muvofiq mehnat stajini hisoblab chiqarish uchun belgilangan miqdorlarda soliq to‘lagan shaxslar.

2025-yil 1-iyuldan davlat budjeti mablag‘lari hisobiga imtiyozli toifaga kiruvchi shaxslarni elektron axborot tizimi orqali hisobga olish va navbat asosida davolanishga yo‘llash tizimiga o‘tkaziladigan (12 ta) tibbiyot muassasalari ro‘yxatiga Mudofaa vazirligining Markaziy harbiy klinik gospitali ham kiritildi.

Bolalar onkologiyasi, gematologiyasi va immunologiyasi ilmiy-amaliy tibbiyot markazi 2027-yil 1-yanvardan boshlab davlat budjeti mablag‘lari hisobiga imtiyozli toifaga kiruvchi shaxslarni elektron axborot tizimi orqali hisobga olish va navbat asosida davolanishga yo‘llash tizimiga o‘tkaziladi.

Hujjat bilan dori vositalari va tibbiy buyumlarning xaridini tartibga solish muddatiga ham o‘zgartirish kiritildi. Endilikda tibbiyot muassasalari tomonidan shoshilinch va tez tibbiy yordam ko‘rsatish uchun dori vositalari va tibbiy buyumlar xaridini amalga oshirish tartibi 2025-yil iyulgacha ishlab chiqilishi kerak.

Dori vositalari va tibbiy buyumlarning dastlabki xarid summasini belgilash uchun marketing tadqiqotlarini o‘tkazish tartibini tasdiqlash muddati ham 2025-yil iyul etib belgilandi. Bunda xarid narxini sun’iy oshishining oldini olishga, geografik jihatdan yaqin davlatlardagi o‘rtacha narxlarni hamda so‘nggi uch yildagi narxlarning o‘zgarish dinamikasini tahlil qilishga qaratilgan choralar belgilanadi. Dori vositalari va tibbiy buyumlar xaridi marketing tadqiqotlari asosida lotlarga bo‘lgan holda amalga oshiriladi.

• Farmon
• Kasallik
• Prezident
• davolanish
• shifoxona