Samarqand viloyati Oqdaryo tumanida 3 kishi is gazidan zaharlanib vafot etdi. Bu haqda “Milliy” telekanalining “Millar” dasturida xabar qilindi.

Hodisa 15-oktyabr kuni Oqdaryo tumani “Taraqqiyot” mahallasidagi dala hovlida sodir bo‘lgan.

“Bular ko‘chib kelishgan. Shanba-yakshanba kunlari kelib, bir xabar olib ketadi. Gaz trubasi to‘lib qolgan ekanmi, o‘g‘li dod-voy qildi. Kirib yordam ko‘rsatdik. Kech kirgan ekanmiz, hamma o‘lgandi… Kirganimizda xona gaz hidi bilan qoplangandi”, — dedi qo‘shnilardan biri.

Ta’kidlanishicha, vafot etganlarning ikki nafari voyaga yetmagan bolalar — 4-sinf o‘quvchisi va 4 yoshli bola bo‘lgan.
Tuman gaz ta’minoti bo‘limi xodimi Abdulla Kubayevning aytishicha, voqea sodir bo‘lgan uyga avval bir necha marta borishgan, ammo doim qulf bo‘lgan.

FVV Samarqand viloyati boshqarmasi xodimi aholini is gazidan zaharlanmaslik uchun nosoz isitish vositalaridan foydalanmaslikka va o‘rnatish vaqtida diqqatli bo‘lishga hamda mo‘rilarini tozalab turishga chaqirdi.

Hozirda holat bo‘yicha tuman prokuraturasi tomonidan tergovga qadar tekshiruv ishlari boshlangan.

• Is gazi
• Qurbon
• Samarqand