2021-yilning 15-dekabr kuniga qadar O‘zbekistonda aholi orasida is gazidan zaharlanish hamda havo-gaz aralashmasi chaqnashi bilan bog‘liq 213 ta holat qayd etilgan. Ularning 66 tasi favqulodda vaziyat sifatida ro‘yxatga olinib, hodisalar oqibatda 125 kishi vafot etgan va 115 kishi jabrlangan.

Favqulodda vaziyatlar vazirligi axborot xizmati rahbari Murod Sodiqovning ma’lum qilishicha, tahlillar is gazidan zaharlanish holatlarining aksariyati fuqarolar tomonidan gaz va muqobil yoqilg‘i (ko‘mir, o‘tin va boshqa) turlaridan foydalanishda xavfsizlik choralariga rioya etmaslik, nostandart (qo‘lbola yasalgan) yoki sertifikatga ega bo‘lmagan isitish pechlari va anjomlaridan foydalanish hamda isitish pechlarining dudburonlarini noto‘g‘ri o‘rnatish natijastda yuzaga kelgan.

FVV vakili shuningdek, isitish mavsumida yuzaga kelishi mumkin bo‘lgan yana bir ko‘ngilsiz holat – gaz-havo aralashmasi natijasida chaqnash, portlash haqida ham ma’lumot berdi.

Ta’kidlanishicha, bu kabi yong‘inlarning 36,3 foizi elektr uskunalaridan foydalanish qoidalarining buzilishi, 27,1 foizi ochiq olovdan ehtiyotsizlik bilan foydalanish, 13,6 foizi isitish pechlarini qurish va ishlatish qoidalarining buzilishi, 9,9 foizi bolalar sho‘xligi oqibatida, 3 foizi gaz jihozlaridan foydalanish qoidalarining buzilishi, shuningdek, 31 tasi gaz-havo aralashmasining chaqnashidan sodir bo‘lgan.

• FVV
• Is gazi
• yong‘in