U-17 Osiyo kubogi saralash uchrashuvlari oldidan “J” guruhidan oʻrin olgan jamoalar bosh murabbiylari ishtirokidagi matbuot anjumani bo‘lib o‘tdi.

Bugungi anjumanda Oʻzbekiston U-17 terma jamoasi bosh murabbiyi Jamoliddin Rahmatullayev:

— “Barchani futbol bayrami bilan tabriklayman. Biz bu saralash bosqichiga yaxshi tayyorgarlik koʻrdik deya olaman. Yaxshi yigʻinlar va oʻyinlar oʻtkazdik. Barchasi optimal darajada. Bolalarda ham motivatsiya yetarli, ularning koʻzi yonib turibdi.

Raqiblar haqida:
— “Bu bosqichda barcha jamoalar kuchli. Lekin biz oʻz yurtimizda, muxlislarimiz oldida oʻynaymiz. Bu bizga yordam beradi va bolalarga qoʻshimcha kuch beradi. Koreya Respublikasi har doim kuchli raqib hisoblanadi. Bizda ularni oʻrganishga yetarli vaqt boʻldi. Tahlil qildik. Ularning kuchli va zaif tomonlarini koʻrib chiqdik. Xudo xohlasa bu jamoaga qarshi oʻyinga tayyormiz.

Tarkib haqida:
— Qaysidir futbolchini maqtab, kimnidir tanqid qilishni xohlamayman. Biz eng yaxshi darvozabonlarni saralab oldik. Ular musobaqaga tayyor.

Shri Lankani musobaqada ishtirok etmasligi:
— Biz bunday holatlarga doim tayyormiz. Bu bizga ruhan taʼsir qilmaydi. Oldimizda 2 ta oʻyin bor. Barchasi oʻzimizning qoʻlimizda. Ularni magʻlub eta olsak, keyingi bosqichga albatta chiqamiz.

Polshadagi turnir haqida
— Har bir turnirda maksimal darajada yaxshi ishtirok etishga harakat qilamiz. Lekin bu turnirda asosan bolalarni koʻrib oldik. Barcha 20 nafar futbolchiga bir xil imkoniyat berishga harakat qildik. Shu sababli bor eʼtiborimizni asosiy musobaqaga qaratdik. Maqsadimiz Yevropaning kuchli jamoalariga qarshi oʻyinlarda xato va kamchiliklarimizni koʻrib olish edi”.

Shuningdek, Oʻzbekiston U-17 terma jamoasi futbolchisi Laziz Mirzayev:

— “Bu bosqichgacha yaxshi oʻyinlar oʻtkazdik. Osiyoning top jamoalari bilan oʻynadik. Bu bizga yetarlicha tajriba berdi deb ayta olaman. Murabbiylarimiz doimiy koʻnikmalar berib kelmoqda. Oʻz uyimizda boʻladigan oʻyinlarga tayyormiz.

— Bosim haqida
Bizda bosim yoʻq. Jamoaning kayfiyati yaxshi. Uyimizda oʻtadigan oʻyinlarda ijobiy natijalar qayd etishga harakat qilamiz”, deya fikrlarini bildirib o‘tdi.

• Futbol
• O‘smirlar
• O‘zbekiston