Germaniyaning Vayssenxaus shahrida bo‘lib o‘tgan Freestyle Chess Grand Slam Tour musobaqasi o‘z yakuniga yetdi. Ushbu musobaqada saralangan jami 10 nafar shaxmatchilar ishtirok etishdi. Ular orasidan Nodirbek Abdusattorov hamda Javohir Sindarov ham o‘rin olgan.

Nodirbek Abdusattorov chorak final bahslarida sobiq jahon chempioni Magnus Karlsenga mag‘lub bo‘lib keyingi o‘rinlar uchun kurashgan bo‘lsa, Javohir Sindarov Hikaru Nakamura ustidan g‘alaba qozongan holda yarim finalgacha yetib bordi. O‘zbekistonlik yosh shaxmatchi hamda AQShlik Fabiano Karuana o‘rtasida kechgan yarim final bahslarining asosiy o‘yinlarida, ikkita qo‘shimcha o‘yinlarda ham durang natija qayd etildi. Yakunda g‘olib Armageddon usuli orqali aniqlandi. Unda qora donalarda o‘ynagan Fabiano g‘alaba qozonib final yo‘llanmasini qo‘lga kiritdi. Javohir Sindarov uchinchi o‘rin uchun kechgan bahsda Magnus Karlsenga imkoniyatni boy berdi.

Musobaqa yakunida mezbon shaxmatchi Vinsent Keymar chempionlikni qo‘lga kiritdi. Javohir Sindarov 4-o‘rin hamda 60 ming AQSh dollari, Nodirbek Abdusattorov 6-o‘rin, 40 ming AQSh dollari miqdoridagi pul mukofotiga ega bo‘ldi.

• Nodirbek Abdusattorov
• O‘zbekiston
• Shaxmat