Jizzax viloyatining Sharof Rashidov tumanida ayolni intim videosini ijtimoiy tarmoqlarga tarqatish bilan qo‘rqitib, pul talab qilganlar qo‘lga olindi. Bu haqida viloyat Ichki ishlar boshqarmasi axborot xizmati xabar berdi.

Ma’lum qilinishicha, bir guruh fuqarolar shu tumandagi ko‘p qavatli uylardan birida ijarada yashovchi, avvaldan tanish bo‘lgan ayoldan pul undirish uchun jinoiy til biriktirgan.

Aniqlanishicha, rejaga ko‘ra, ulardan biri ayol bilan jinsiy aloqa qilayotgan vaqtda telefon orqali videoga olingan. Shundan so‘ng videoni ijtimoiy tarmoqlarga tarqatmaslik evaziga 3 million so‘m talab qilgan.

Qayd etilishicha, bu haqdagi ariza asosida viloyat IIB Jinoyat qidiruv boshqarmasi korrupsiya va iqtisodiy jinoyatlarga qarshi kurashish bo‘limi xodimlari tomonidan tezkor tadbir o‘tkazilib, jinoyatni sodir etgan shaxslar ushlangan. Xususan, pul talab qiluvchilardan biri Jizzax shahrining Olmazor mahallasi hududida jabrlanuvchidan pulni olgan vaqtida hamda qo‘lga kiritilgan mablag‘ sheriklariga yetkazilganda daliliy ashyo bilan qo‘lga olingan.

• Ayollar
• Jinoyat
• Jizzax