Ijtimoiy tarmoqlarda “Jizzax viloyati Sharof Rashidov tumanida oilaviy janjallar va qotilliklar ko‘paymoqda” mavzusida xabar tarqaldi.

Qayd etilishicha, tumanning Fayziobod MFYda bir ayol eri tomonidan pichoqlab o‘ldirilganligi, qotillikka oilaviy janjal sabab bo‘lgani aytilgan.

Viloyat IIB ma’lumotlariga ko‘ra, 2022-yilning 19-dekabr kuni taxminan soat 18:00 da 1972-yilda tug‘ilgan B.I. va turmush o‘rtog‘i N.I.lar o‘rtasida oilaviy kelishmovchilik sababli janjal kelib chiqqan. Janjal vaqtida B.I. qo‘lida bo‘lgan oshxona pichog‘i bilan turmush o‘rtog‘ining o‘ng yelka qismiga urib tan jarohati yetkazgan. Oqibatda 1975-yilda tug‘ilgan N.I. og‘ir tan jarohati olib Respublika shoshilinch tibbiy yordam ilmiy markazining Jizzax filialida ko‘rsatilgan muolajalarga qaramasdan vafot etgan. B.I. prosessual tartibda ushlanib, vaqtincha saqlash hibsxonasiga joylashtirilgan.

Qayd etilgan holat yuzasidan O‘zbekiston Respublikasi JKning 104-moddasi 3- qismi “d” bandi bilan jinoyat ishi qo‘zg‘atilib, dastlabki tergov harakatlari olib borilmoqda.

Mazkur holat yuzasidan 2022-yilning 22-dekabr kuni Jizzax viloyati IIB, Sh.Rashidov tumani IIB hamda viloyat va tuman prokuraturasi, sektorlar, tuman hokimligi mas’ul rahbarlari tomonidan mahallada aholi ishtirokida jinoyat muhokamasini o‘tkazilgan.

“Ta’kidlash joiz, gumonlanuvchi B.I. shu vaqtga qadar spirtli ichimlik iste’mol qiluvchilar va oilaviy janjalkashlar sifatida IIOning profilaktik hisobida turmagan. Shuningdek ushbu oila mahallada ijobiy tavsiflanib, janjalkash oilalar ro‘yxatida turmagan”, – deyiladi xabarda.

• Ayollar
• IIB
• Janjal
• Jizzax
• O'lim
• erkaklar