Jizzax viloyati huquq-tartibot idoralari hamkorligida o‘tkazilgan tezkor tadbirlar davomida vohaning turli hududlarida 3 nafar shaxs kuchli ta’sir qiluvchi psixotrop va narkotik moddalar bilan qo‘lga olindi.

O‘tkazilgan tezkor tadbir davomida Jizzax shahrida yashovchi P.E. 28 dona kuchli ta’sir qiluvchi psixotrop modda bilan G‘allaorol tumanidagi “Sangzor-15” YPX maskanida ashyoviy dalil bilan qo‘lga olingan.

Ikkinchi tezkor tadbir Sharof Rashidov tumanida amalga oshirilib, ushbu tadbir jarayonida shu tumanda istiqomat qiluvchi B.O. boshqaruvidagi va unga tegishli bo‘lgan Lacetti rusumli avtomashina to‘xtatilib, ko‘zdan kechirilganida, 56 (ampula) dona kuchli ta’sir qiluvchi dori vositasi borligi aniqlangan.

Shuningdek, Baxmal tumanida yashovchi I.J. 509 gramm narkotik moddani Toshkent viloyati Bo‘ka tumani hududidagi yashirin joydan olib, Jizzax viloyatiga keltirayotgan vaqtda qo‘lga olingan.

Har uchala holatda kuchli ta’sir qiluvchi ushbu dori vositalari va giyohvandlik moddasi ashyoviy dalil sifatida olib qo‘yilgan.

“Mazkur holatlar yuzasidan O‘zbekiston Respublikasi Jinoyat kodeksining tegishli moddalariga asosan jinoyat ishlari qo‘zg‘atilib, tergov harakatlari olib borilmoqda”, – deya xabar bermoqda O‘zA.

• Giyohvandlik
• IIB
• Jinoyat
• Jizzax