Jizzax viloyati Do‘stlik tumanida 5-yanvar kuni beton to‘siqqa urilgan “Nexia” yonib ketdi. Bu haqida Favqulodda vaziyatlar vazirligi axborot xizmati xabar berdi.

Ma’lum bo‘lishicha, 2022-yil 5-yanvar soat 13:52 da viloyat Favqulodda vaziyatlar boshqarmasiga 101 qisqa raqami orqali M-39 Olmaota–Toshkent–Termiz xalqaro avtomobil yo‘lining Do‘stlik tumani hududidan o‘tuvchi 942-kilometrida yengil avtomobil yonayotgani to‘g‘risida ma’lumot kelib tushgan.

Aytilgan joyga tuman FVBdan qutqaruvchilar bo‘linmasi yuborilgan. Shuningdek, yong‘in joyiga Sirdaryo viloyati Sardoba tumani FVB 8-sonli yong‘in-qutqaruv qismidan ham 1 ta bo‘linma yetib borgan. Ko‘rilgan tezkor chora-tadbirlar natijasida yong‘in to‘liq bartaraf etilgan.

Aniqlanishicha, Toshkent–Termiz yo‘nalishida harakatlanib ketayotgan “Nexia” shu yo‘nalishdagi yuk avtomobili bilan to‘qnashuvi oqibatida beton to‘siqqa borib urilgan va yong‘in kelib chiqqan. Hodisa oqibatida hech kim jabrlanmagan. Ko‘rilgan moddiy zarar miqdori aniqlanmoqda, deyiladi xabarda.

• Jizzax
• YTH
• yong‘in