Hujumchi Joau Feliks mavsumning qolgan qismini Madridning “Atletiko”sida oʻtkazishi mumkin.

Relevo xabariga koʻra, portugaliyalik madridliklar safida kamida yozgacha qolish ehtimoli bor.

Yarim himoyachining boshqa klubga oʻtishiga toʻsqinlik qilayotgan asosiy sabab — uning narxi. “Atletiko” 130–140 million yevro talab qilmoqda.

Feliksga qiziqayotgan klublarning hech biri bunday pul toʻlashga tayyor emas. Sotib olish majburiyati bilan ijara yoki sotib olish opsiyasi kabi variantlar ham koʻrib chiqildi, ammo bu holatda ham transfer potensial xaridorlarga juda qimmatga tushadi.

Qolaversa, “Atletiko” Joauning saviyasidan kelib chiqib, jamoaga yordam bera olishiga ishonmoqda.

23 yoshli futbolchiga “Chelsi”, “Arsenal” va “Manchester Yunayted” hamon qiziqish bildirmoqda, ammo bu klublar “Atletiko”ning moliyaviy talablarini qondira olmaydi.

Maʼlumot oʻrnida, Feliks joriy mavsum La Ligada 13 ta oʻyinda maydonga tushib, 4 ta gol urdi va 3 ta golli uzatmani amalga oshirdi.

• Atletiko Madrid
• Futbol
• Transferlar