O‘zbekistonda 2025-yilning birinchi choragida yo‘l-transport hodisasi keltirib chiqargani uchun 173 nafar shaxs ozodlikdan mahrum qilindi. Bu haqda Oliy sud matbuot xizmati xabar berdi.

Jinoyat kodeksining 266-moddasi  (transport vositalari harakati yoki ulardan foydalanish xavfsizligi qoidalarini buzish) bo‘yicha jami 891 nafar shaxs sudlangan.

2024-yil davomida esa ushbu modda bilan 3 321 nafar shaxs sudlanib, ularning 917 nafariga ozodlikdan mahrum qilish jazosi, 2 404 nafariga esa ozodlikdan mahrum qilish bilan bog‘liq bo‘lmagan jazolar tayinlangan.

Shuningdek, Senat qo‘mitasiga ko‘ra, 2024-yil hisobot davrida 9 364 ta yo‘l-transport hodisasi sodir etilib, 8 901 nafar fuqaro jarohatlangan va 2 203 nafar fuqaro halok bo‘lgan. Yo‘l-transport hodisalarining 47,1 foizi haydovchilar tomonidan piyodaga yo‘l bermaslik hamda 22,8 foizi belgilangan tezlikka rioya qilmasligi, 3,7 foizi uxlab qolishi va 3,6 foiz YTHlar svetoforga amal qilmaslik oqibatida sodir bo‘lgan.

Respublika hududida shaharlararo va xalqaro yo‘nalishlarda yo‘lovchi tashuvchi avtobuslarni nazorat qilish bo‘yicha o‘tkazilgan maxsus reyd tadbirlarida avtobusni mast holda boshqarish bilan bog‘liq 61 ta holat aniqlangan.

• Jazo
• Jinoyat
• YTH