Yosh o‘tgan sayin odam immuniteti tobora zaiflashib boraveradi. Qarish jarayoni va immun tizimi o‘rtasidagi bog‘liqlikni o‘rgangan tadqiqotchilar xulosasi shunday: keksalarda timus bezi hajmi kichrayib, gormonlar ishlab chiqarilishi ozayishi va limfoid to‘qimalar atrofiyasi kuzatilishi – tasdiqlangan ilmiy fakt.
Buning oqibati qon tarkibida T-limfotsitlar miqdori kamayishiga olib keladi va limfotsitlar hujayralar yordamida faollashish qobiliyatini bora-bora yo‘qotadi.
Xabarga ko‘ra,“shu omilga asoslangan Buyuk Britaniya olimlari muayyan hujayralarga ta’sir ko‘rsatuvchi muolaja usuli orqali keksa insonlar immunitetini tiklash yo‘lini topgan”.
Tadqiqot davomida gematopoyetik ildiz hujayralarini yo‘q qilish va ularni yangilari bilan almashtirish yordamida immunitet tizimi muvozanatini tiklash mumkinligi o‘rganilgan.
Buning uchun dastlab sichqonlar ustida tajriba o‘tkazilib, 18-24 oylik ushbu jonivorlar organizmiga gematopoyetik ildiz hujayralarining bir qismini yo‘q qilishga qaratilgan antitanalar yuborilgan va natijada tanaga kiritilgan yangi V va T-limfotsitlari tufayli immun tizimi mustahkamlangan.
“Biz bitta muolaja kursi bu qadar katta samara berganidan hayratdamiz. Muhimi, davolangan va davolanmagan hayvonlar o‘rtasidagi tafovut ikki oydan keyin ham saqlanib qoldi. Masalan, muolaja qilingan jonivorlar sakkiz hafta o‘tgach, ilgari duch kelmagan virusga qarshi emlanganida, ularning immun tizimi boshqa hayvonlarnikiga qaraganda kuchliroq javob reaksiyasini namoyon qilib, infeksiyaga ancha samarali qarshilik ko‘rsata oldi”, – deyiladi xabarda.
Shundan kelib chiqib, tadqiqotchilar mazkur yangi usul keksa insonlarning koronavirus singari xavfli infeksiyalar va boshqa yuqumli kasalliklarga qarshi himoya qobiliyatini oshirishiga ishonch bildirmoqda. Yakuniy xulosa esa insonlarda o‘tkaziladigan klinik sinovlar muvaffaqiyatiga bog‘liq.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!