Ijtimoiy tarmoqlarda Navoiy davlat pedagogika instituti prorektori ekanligi aytilayotgan erkakning talabalar bilan hijob va soqol mavzusida suhbat olib borgani yozilgan audio tarqalmoqda.

Lavozimi ma’lum qilinmagan shaxs baland va tahdidli ohangida hijob o‘ragan hamda soqol qo‘ygan talabalarni bu ishni to‘xtatishga chaqirgan.

U suhbatda talaba qizlarning biriga uydagilarga to‘g‘ri tushuntirishi kerakligini, chunki bu masalada o‘ziga ham bosimlar bo‘layotganini aytadi.

“Meni ham qo‘ymaydi. Kerak bo‘lsa, oyoq-qo‘limni bog‘lab milliy xavfsizlikka (MXX, -tahr.) olib borib tiqadi. Hali senga vaqt bor. Sen ham kattaonangday bo‘lganingda ulgurasan”, – deydi OTM mas’uli.

Shuningdek, u viloyatda ro‘mol o‘ragan 10ta qiz Suriyaga o‘tib ketganini, bu uchun hozirda dekan va dekan o‘rinbosari prokuraturada tergov berib yurganini, hatto, ularni chetga chiqib ketganini ota-onasi ham bilmaganini aytadi.

Talaba qizning bu masalada o‘zida tushuncha borligi, ongida bu kabi g‘oyaviy bo‘shliqlar bo‘lmagani haqidagi e’tiroziga “pedinstitut” mas’uli alohida xonada unga bu borada tushuntirishlar berishini ta’kidlaydi.

U, shuningdek, talabalarga shanba kunidan boshlab to‘liq formada kelishi kerakligini uqtirib, ikkita fakultetda olib borilgan o‘rganishlar ortidan hokim rektorga (ayni paytdagi rektor Bahodir Sobirov, -tahr.) “xayfsan” berganini, bu yig‘ilishda Quranbayev (Qahramon Quranboyev Prezidentning yoshlar siyosati masalalari bo‘yicha davlat maslahatchisi, -tahr.) qatnashganini, unda Institutning yoshlar bilan ishlash bo‘yicha prorektori Qurbonov (Qurbonov Xurshid, -tahr.) qatori boshqa prorektorlar ham Tushuntirish xati yozganini aytadi. Bundan tashqari, uning aytishicha, 11ta “zamdekan” Tushuntirish xati yozgan.

“Ertadan formasiz keladigan bo‘lsang, darsda o‘tirmaysan”, – deydi prorektor.

• Institut
• Navoiy
• Pedagogika