Joriy yilning 18-sentyabr kuni Toshkent shahar Shayxontohur tumani sudida yopiq mahkama jarayonida sud muzokarasi boʻlib oʻtdi.

Unga koʻra, prokuror Oʻzbekiston Respublikasi JKning tuhmat, haqorat va tovlamachilik moddalari bilan sudlanayotgan “Human.uz” sayti asoschisi va rahbari Xurshid Daliyev va “Oʻzbekneftgaz” shirkati matbuot kotibi Siyovush Hoshimovlarni 15 yilga ozodlikdan mahrum etish va 3 yilga jurnalistik faoliyat bilan shugʻullanishni taqiqlashni soʻragan.

Shuningdek, oʻtgan hafta prokuror Bandlik va mehnat munosabatlari vazirligining sobiq matbuot kotibi, jurnalist Mavjuda Mirzayevaga 3 yil davomida professional kasbiy faoliyat bilan shugʻullanishni taqiqlab, uni 6 yilga ozodlikdan mahrum qilish bilan jazolashni soʻragandi.

Sudlanuvchilar shu yilning 24-yanvarida qamoqqa olingan va DXXning “Gvardeyskiy” nomi bilan ataluvchi tergov izolyatorida saqlanib kelmoqda.

Qayd etilishicha, “Kompromatuzb ishi” yuzasidan shu paytga qadar 10 dan ortiq gumondorlar hibsga olingan. Hozirda mazkur ish boʻyicha ayblanuvchilardan 5 nafarining ismi jamoatchilikka maʼlum.

• DXX
• Shayboniyxon
• Sud
• Toshkent