Oliy Majlis qonunchilik palatasi deputati Rasul Kusherbayev o‘zining ijtimoiy tarmoqdagi sahifasida yangi qabul qilinadigan O‘zbekiston Konstitutsiyasidan nimalar kutayotgani haqida aytib o‘tdi.

“Sodiq Safoyev agar yangi Konstitutsiya qabul qilinsa, u albatta barcha fuqarolar uchun, shu jumladan, bugungi prezidentimiz uchun ham yangi konstitutsiya bo‘yicha saylovlarda ishtirok etishga imkoniyat yaratib berishi haqida fikr bildiribdi. Albatta mazkur masalada har xil fikr va yondashuvlar bo‘lmoqda. Shaxsan menga bu borada Konstitutsiyaviy sudning fikri qanday ekanligi qiziq. Agarki yangi Konstitutsiya haqida gapirsak, u haqiqatan ham yangi bo‘lishi, davlat boshqaruvidan tortib, fuqaro va davlat o‘rtasidagi munosabatlarga qadar barcha masalalar fundamental o‘zgarishi kerak. Masalan, men Konstitutsiyada mamlakat hayotida parlament rolini oshirish maqsadida huquqni muhofaza qilish idoralari jumladan, prokuratura, davlat xavfsizlik xizmati, ichki ishlar, bojxona, Milliy gvardiya, mudofaa tizimining parlamentga hisobdor bo‘lib, tizim rahbariyati parlament tomonidan lavozimga tayinlanib, lavozimdan olinishini Konstitutsion qoida sifatida belgilab qo‘yish zarur, deb hisoblayman”, - deydi Rasul Kusherbayev.

Oliy Majlis qonunchilik palatasi deputati so‘zida davom etib, ijro hokimiyatida bosh vazir institutini kuchaytirish, joylardagi vakillik organlarini hokimlardan alohida qilish, fuqarolik jamiyati institutlarining imkoniyatlarini kengaytirish masalalariga ham to‘xtalib o‘tdi.

“Ijro hokimiyatida bosh vazir institutini kuchaytirish, joylardagi vakillik organlarini hokimlardan alohida qilish, fuqarolik jamiyati institutlarining imkoniyatlarini kengaytirish, siyosiy partiyalar tashkil etishni soddalashtirish masalalari ham Konstitutsiyadan o‘rin olishi kerak. Shuningdek, eng ko‘p amal qilinmayotgan mulk daxlsizligi masalasida Konstitutsiyada qat’iy va o‘zgarmas qoidalar bo‘lishi shart”.

Avvalroq, Senat raisining birinchi o‘rinbosari Sodiq Safoyev yangi Konstitutsiya qabul qilinsa, u barcha fuqarolar uchun, shu jumladan, hoziri prezident uchun ham saylovlarda ishtirok etishga imkoniyat yaratib berishini aytgandi.

• Konstitutsiya
• Siyosat