Bugun.uzning ma’lum qilishicha, Oʻzbekiston davlat xavfsizlik xizmati tomonidan butun mamlakat boʻylab oʻtkazilgan yirik operatsiya davomida turli jinoiy guruhlarning yuzlab oddiy va yuqori martabali aʼzolari, jumladan, “kriminal avtoritet”lar panjara ortiga joylashtirilgan.

Xususan, “Baxti Tashkentskiy” va “Baxti Yangiobodskiy” laqablari bilan mashhur bo‘lgan 52 yoshli Baxtiyor Qudratullayev, shuningdek, unga yaqin odamlar ham qoʻlga olingan.
Nova24.uz nashrining ma’lumotiga ko‘ra, qo‘lga olinganlar orasida “Saidaziz Medgorodok” laqabi bilan mashhur Saidaziz Saidaliev ham bo‘lgan. U bilan birga o‘sha paytda uning yonida bo‘lgan yana to‘rt kishi ham qo‘lga olingan.

Mazkur reydlar “Humo” arenasidagi tartibsizliklar fonida Toshkentdagi huquqni muhofaza qiluvchi idoralar hamkorligida oʻtkazilgan.

Maxsus xizmatlar tergov davomida Milliy gvardiya bilan toʻqnashuv ishtirokchilari orasida Toshkent va Oʻzbekistonning boshqa shaharlaridan kelgan jinoiy guruhlarining koʻplab vakillari borligini aniqlagan. Shuningdek, tezkor xodimlarning soʻzlariga koʻra, aynan mafiya qalbaki chiptalar savdosi bilan bogʻliq boʻlgan.

Maʼlumotlarga koʻra, Jah Khalib konsertiga jami 12 ming kishi kelgan, biroq atigi 9 ming kishi haqiqiy chiptaga ega boʻlgan, qolgan chiptalar soxta boʻlgan.
Bugun.uz manbasiga koʻra, maxsus operatsiyaga tayyorgarlik bir necha oy oldin boshlangan hamda maxsus xizmatlar reydning barcha detallarini aniq ishlab chiqqan boʻlgan.

Humo arena yaqinidagi tartibsizliklardan soʻng respublikaning barcha huquq-tartibot idoralari rahbariyati bilan bir necha bor yopiq majlislar oʻtkazilib, maxsus operatsiyani tezlashtirishga qaror qabul qilinib, keng koʻlamli tozalash operatsiyasi boshlangan.

Eslatib oʻtamiz, qozogʻistonlik mashhur reperning konsertiga minglab odamlar qalbaki chiptalar yordamida kirishga uringan, urinishlar tartibsizliklarga aylanib ketgandi. Humo arena yaqinida sodir boʻlgan tartibsizliklar vaqtida bir necha kishi jarohat olgani xabar qilingandi.

• Jinoyat
• Milliy gvardiya