Angliyaning “Lester” klubi “Chelsi” oʻz safiga qoʻshib olmoqchi boʻlgan 21 yoshli himoyachi Uesli Fofanning narxini belgilab oldi.

Foot Mercato maʼlumotlariga koʻra, “tulkilar” oʻz oʻyinchisi uchun kamida 95 million yevro olishni kutmoqda, bu esa futbolda tarixdagi himoyachilar uchun belgilangan eng qimmat shartnoma boʻlishi mumkin.

Fofana uchun oshirilgan narx shu yilning mart oyida shartnomani uzaytirishi bilan bogʻliq boʻlib, natijada fransuz futbolchisi “tulkilar” safida 2027-yilgacha qolishini rasmiylashtirgan.

Maʼlumotlarga koʻra, klublar oʻrtasidagi muzokaralar shu dam olish kunlari faollashishi kerak va “Lester”ning oʻzi futbolchining oʻrnini bosadigan futbolchi izlay boshlagan.

“Tulkilar” avvalroq “Chelsi”ning 75 va 82 million yevrolik ikkita taklifini rad etgandi.

Fofana 2020-yil oktyabr oyida “Sent-Etyen”dan “Lester Siti”ga oʻtgan edi. Oʻshandan beri himoyachi 50 oʻyinda 1 ta gol urdi va bitta golli uzatmani amalga oshirdi.

• Futbol
• Transferlar
• Xorij