Lotin Amerikasi mamlakatlari El-Nino iqlim fenomeni sababli yuzaga kelgan rekord darajada yuqori haroratlar hamda bu jaziramaning o‘rmon yong‘inlari ko‘rinishidagi salbiy oqibatlari bilan to‘qnash kelmoqda. Bu haqda TASS xabar berdi.

Qayd etilishicha, Janubiy Amerika qit’asi hududi anomal issiq oqibatlarini boshidan kechirmoqda. Shuningdek, ular aholi salomatligiga va mintaqa ekotizimiga xavf tug‘dirmoqda. Jahon yovvoyi tabiat fondi (WWF) xodimi Xayro Gerrero jaziramaning asosiy sababi sifatida 2023-yil mayidan buyon kuzatib kelinayotgan El-Nino hodisasini keltirib o‘tdi.

Ta’kidlanishicha, yuqori harorat Janubiy Amerikada o‘rmon yong‘inlari tarqalishiga imkoniyat yaratmoqda. Kolumbiya yong‘inlar tufayli tabiiy ofat haqida e’lon qildi va BMTdan xalqaro yordam so‘radi. Chilida Tabiiy ofatlar oldini olish va ularga javob ko‘rsatish bo‘yicha milliy xizmat ham mamlakatda o‘rmon hududlari yonishiga qarshi kurashayotganini ma’lum qilgan.

Mintaqadagi ba’zi mamlakatlar fuqarolarni salomatlikka zarar yetkazishi mumkin bo‘lgan o‘ta yuqori haroratlar haqida ogohlantirgan. Braziliyaning Rio-de-Janeyro kabi bir qator shaharlarida Selsiy bo‘yicha 60 darajagacha yetadigan harorat haqida xabar berilmoqda. Argentinada sakkizta provinsiyada anomal jazirama qayd etilgan.

Baland harorat haqidagi ogohlantirishlar Ekvador, Urugvay va Peruda ham e’lon qilingan. Iqlim hodisasi 2024-yil iyunigacha davom etishi aytilmoqda.

• Jazirama
• yong‘in