Belarus rahbari Aleksandr Lukashenko Moskvadagi g‘alaba paradi marosimida sog‘lig‘ining yomonlashgani haqidagi mish-mishlarga izoh berib, ularni aqlga sig‘dirib bo‘lmaydigan ahmoqlik, deb atadi. Bu haqda BelTA nashri ma’lum qildi.

Qayd etish mumkin, siyosatchi joriy yil 9-may kuni Rossiya poytaxtiga tashrif buyurgan, biroq Qizil maydondagi paraddan tashqari barcha rasmiy tadbirlarda ishtirok etmagan.

Keyinchalik uning safar vaqtida qo‘liga bog‘ich taqilgan holatdagi suratlari tarqaldi va yurak xurujiga uchragan yoki adenovirusga chalingan bo‘lishi mumkinligi taxmin qilindi. O‘shanda Belarus rahbari hatto Minsk shahriga belgilangan muddatdan ilgari qaytib ketgani aytilgan edi.

“Meni Moskva Markaziy shifoxonasiga olib borishgani haqidagi va shu bilan bog‘liq xabarlar aqlga sig‘dirib bo‘lmaydigan ahmoqlikdir. Yana bir narsa – bu Markaziy shifoxona qayerdaligini ham bilmayman. Agar menga yordam kerak bo‘lsa, bir necha soat ichida Putin o‘sha shifoxonadan o‘nlab shifokorlarni chaqirtirgan bo‘lardi”, – deydi Lukashenko.

Lukashenko xastalangani haqidagi xabarlardan so‘ng birinchi marta 15-may kuni omma oldiga chiqdi. O‘sha vaqtda ham uning chap qo‘lida maxsus bog‘ich bor ekani ma’lum bo‘lgan edi.

• Belarus
• Lukashenko
• Putin
• Rossiya
• salomatlik