Davlat xavfsizlik xizmatining Toshkent viloyati boʻyicha boshqarmasi hamda viloyat prokuraturasi hamkorligida madaniy meros obyektlaridagi bir nechta qonunbuzilish holatlariga chek qoʻyildi.

Xususan, shlakoblok ishlab chiqaruvchi MChJ rahbari A.U. 2019-yilda hokimiyat tizimidagi mansabdor shaxslar bilan kelishgan holda qalbaki hujjatlar asosida, Nurafshon shahridagi “Ulkan Toʻytepa” arxeologiya yodgorligi hududining 30 sotix yer maydonini oʻz nomiga rasmiylashtirib olgan.

2020–2021-yillar davomida u mazkur yer maydonida shlakoblok ishlab chiqarishi va bu uchun kerak boʻladigan inshootlarni qurishi oqibatida madaniy meros obyektiga 306 mln. 720 ming soʻm miqdorida zarar yetkazgan.

Keltirilishicha, jinoyat ishlari boʻyicha Nurafshon shahar sudining hukmiga asosan A.U. Jinoyat Kodeksining 132 va 228-moddalari bilan aybdor deb topilib, unga nisbatan 1 yil 7 oy muddatga ozodlikdan mahrum qilish jazosi tayinlangan.

Shuningdek, 2018-yilda Qibray tumanidagi “Qilichli ota” ziyoratgohida qayta taʼmirlash va tiklash ishlarini amalga oshirish uchun qurilish sohasida faoliyat yurituvchi MChJga 355 mln. 473 ming soʻm miqdorida budjet mablagʻi ajratilgan.

Biroq MChJ rahbari N.H. bajarilgan ishlar boʻyicha tuzilgan hisob-fakturalarga soxta maʼlumotlar kiritib, amalda bajarilmagan ish hajmini qoʻshib yozish orqali 263 mln. 286 ming soʻm miqdoridagi mablagʻni talon-taroj qilgan.

Jinoyat ishlari boʻyicha Qibray tuman sudining hukmiga asosan N.H. Jinoyat Kodeksining 167 va 228-moddalari bilan aybdor deb topilib, unga nisbatan 5 yil 1 oy muddatga ozodlikdan mahrum qilish jazosi tayinlangan.

• DXX
• Madaniy meros
• Prokuratura
• Toshkent viloyati