“O‘zbekiston elchisi Karomiddin Gadoyev Malayziyaning “Pro Events and Marketing Sdn Bhd” kompaniyasining boshqaruv direktori Elayne Txam bilan uchrashuv o‘tkazdi”, – deb xabar qilmoqda “Dunyo” AA.

Unda O‘zbekistonda Malayziyaning mazkur kompaniyasi ishtirokida investitsiya loyihalarini amalga oshirish istiqbollari muhokama qilingan.

Malayziya tomoni O‘zbekistonda elektr skuterlar (3 va 4 g‘ildirakli ixcham elektromobil) ishlab chiqarish loyihasini amalga oshirish imkoniyatlarini ko‘rib chiqayotganini ma’lum qilgan. “Dastlabki hisob-kitoblar asosida yillik ishlab chiqarish miqdori 5 mingta skuterni tashkil etishi ko‘zda tutilmoqda. Keyinchalik Markaziy Osiyo mamlakatlariga eksport qilish salohiyatlarini inobatga olgan holda, uni 10 mingtaga yetkazish imkoniyati mavjud. Skuterlar ishlab chiqarishni mahalliylashtirish O‘zbekistonda aholiga yetkazib berish xizmatining sifatini yanada oshirishga xizmat qilishi mumkin”, – degan kompaniya boshqaruv direktori Elayne Txam.

Shuningdek, xorij tomoni O‘zbekistonda sog‘liqni saqlash sohasida sun’iy intellekt yordamida insonlarda tibbiy diagnostika o‘tkazish dasturiy ta’minotini joriy qilish bo‘yicha hamkorlikka tayyorligini bildirgan.

Uchrashuv yakunida belgilangan loyihalarni amalga oshirish istiqbollarini o‘rganish uchun kompaniya rahbariyatining O‘zbekistonga biznes-missiyani tashkil etishga kelishib olingan.

• Malayziya
• O‘zbekiston
• Skuter
• elektr
• kompaniya