Ispaniya chempionati “Sevilya”ga qarshi o‘yin oldidan “Real” bosh murabbiyi Karlo Anchelotti matbuot anjumanida ishtirok etdi. 

Italiyalik murabbiydan “PSJ” vakili Kilian Mbappe va Dortmundning “Borussiya” klubi a’zosi Erling Xolandlar orasidan qay birini tanlashini so‘rashdi.

“Menga yuqori potensialli mehnatkash futbolchilar har doim yoqqan, Mbappe va Xolandni ular qatoriga kiritishim mumkin. Ammo, aniq bittasini ko‘rsatishim qiyin.

Barchasi transferlar oynasi ochilgan paytda sodir bo‘ladi”, deya murabbiy savolga to‘g‘ridan-to‘g‘ri javob berishdan bosh tortdi.

Qayd etish kerak, Mbappe va Xolandning “Real”ga o‘tishi borasidagi mish-mishlar anchadan beri yangrab kelmoqda. Biroq “qirollik klubi”ning yozda yuritgan transfer siyosatiga ko‘ra, fransiyalik futbolchining Madridga ko‘chib o‘tish ehtimoli yuqoriroq.

Eslatib o‘tamiz, “Real” hamda “Sevilya” jamoalari o‘rtasidagi uchrashuv bugun tunda bo‘lib o‘tadi.

• Futbol
• Xorij