Prezident Andres Manuel Lopes Obrador hokimiyat tepasiga kelganidan keyin uch yil ichida OAVga hujumlar 85 foizga oshdi, deb xabar beradi “The Guardian” nashri.

Manbaning maʼlum qilishicha, shtat prokurorlari 47 yoshli Antonio de la Kruzning chorshanba kuni 23 yoshli qizi bilan AQSh chegarasi yaqinida joylashgan Tamaulipas shtatidagi uyidan chiqayotganida otib oʻldirilganini qayd etishgan.

Taxminan oʻttiz yildan beri mahalliy “Expreso” gazetasining muxbiri sifatida ishlagan De la Kruzning oʻldirilishi oqibatida joriy yil mamlakatda halok boʻlgan jurnalistlar soni 12 taga yetgan.

Qayd etilishicha, hali hamon Meksika OAV xodimlari uchun dunyodagi eng xavfli davlatlardan biri boʻlib qolmoqda.

“Expreso” gazetasi shaharning barcha turdagi yangiliklarini, jumladan, xavfsizlik masalalarini qamrab oladi. Marhum OAV xodimi asosan hududdagi suv tanqisligi kabi ijtimoiy mavzularni yoritib borgan.

• Jurnalistika
• Meksika
• Qotillik