Bugun, 22-iyun kuni O‘zbekiston Prezidenti Shavkat Mirziyoyev va Ozarbayjon Prezidenti Ilhom Aliyev Xiva shahriga tashrif buyurdi.

Kecha bo‘lib o‘tgan muzokaralar yakunida davlat rahbari o‘zbek va ozarbayjon xalqlari munosabatlarining shonli tarixi bugungi ko‘p qirrali hamkorlik uchun mustahkam poydevor yaratganini ta’kidlagan edi.

Haqiqatan ham, qardosh xalqlar azaldan bordi-keldi qilib, bir-birining madaniyatini boyitgan. 2500 yildan ziyod tarixga ega Xiva bunda muhim o‘rin tutgan.

Shu jihatdan, O‘zbekiston va Ozarbayjon Prezidentlarining bu qadimiy shaharga tashrifi katta ma’noga ega.

Qayd etish joiz, Ichan qal’a nodir shahar-yodgorlik sifatida diqqatga sazavor. Bu yerda 120 dan ziyod me’moriy obidalar bor. Shu bois Xiva shahri 1990-yil 12-dekabrda YUNESKO Madaniy meros ro‘yxatiga kiritilgan.

Xususan, davlat rahbarlari Ota darvozadan kirib, Ko‘k minora, Ko‘hna ark saroyi, Sherg‘ozixon madrasasi, Juma masjidi, Tosh hovlini tomosha qildi, Allomalar muzeyi bilan tanishgan.

Shuningdek, Xorazmcha qo‘shiq va raqslar ijrosi mehmonlarga ko‘tarinki kayfiyat baxsh etgan.

Prezidentlar Ichan qal’a yaqinidagi Nurillaboy saroyini ham borib ko‘rdi.

Bu majmuani 1884-yilda Xiva xoni Muhammad Rahimxon Feruz qurdirgan. Keyinchalik qo‘shimcha binolar ham barpo etilib, beshta hovlidan tashkil topgan. Saroyda ham sharqona, ham yevropacha uslubdagi arxitektura ajoyib tarzda uyg‘unlashgan. Yana bir e’tiborli jihati, XX asr boshlarida ko‘pgina siyosiy jarayonlar aynan shu saroyda kechgan.

Ta’kidlanishicha, Xivaning davlatchilik va ilm-fan rivojida tutgan o‘rni, qadimiy obidalari va san’ati ozarbayjonlik mehmonlarda katta taassurot qoldirdi.

• Ichan qal'a
• Ilhom Aliyev
• Shavkat Mirziyoyev
• Tashrif
• Xiva