Joriy yilning 23 aprel kuni Mo‘ynoq tumanida O‘zbekiston Respublikasi Bosh prokuraturasi tomonidan O‘zbekiston yilqichilik va ot sporti federaеsiyasining Qoraqalpog‘iston bo‘limi va tuman hokimligi bilan hamkorlikda Milliy ot o‘yinlari bo‘yicha ochiq turnir tashkil qilindi.

“Turnirni tashkil qilishdan asosiy maqsad – ot sportini rivojlantirish, yoshlarga e’tiborni kuchaytirish, ularni madaniyat, jismoniy tarbiya va sportga keng jalb etish, milliy an’analarga mos ravshda tarbiyalashga qaratilgan”, – deyiladi xabarda. 

Bundan tashqari, turnirni tashkil qilish orqali tumanda turizm sohasida faoliyat olib boruvchi korxonalarni qo‘llab-quvvatlash, Mo‘ynoq tumanining turizm potensialini namoyish qilish ko‘zda tutilgan.

Musobaqada Qoraqalpog‘iston Respublikasining shahar va tumanlaridan kelgan 300 dan ortiq ot sporti ustalari otdan turib yerdan tanga olish, ot ustida polvonlar kurashi, ot ustidan kelib nayza otish, 3 aylov jorg‘a, 3-5-7-10 aylov ot musobaqalari, jamoaviy ko‘pkari o‘yini va olomon ko‘pkari o‘yini va boshqa milliy ot sport yo‘nalishlari bo‘yicha kuch sinashmokda.

Turnir yakunida g‘oliblar va sovrindorlar tashkilotchilar tomonidan qimmatbaho sovg‘alar va turnir medallari bilan taqdirlanishi aytib o‘tilgan.

• Mo'ynoq
• Ot sporti
• Qoraqalpog‘iston