National Geographic jurnalida “Ipak yo‘li shahrining qadimiy moʻjizalari ortidagi bahslar” mavzusida maqola chop etildi, deb xabar beradi Sputnik Uzbekistan nashri.

Ingliz tilidagi jurnalda Samarqandning diqqatga sazovor joylari tilga olingan.

Maqolada Bibi Xonim masjidi shaharga tashrif buyurgan va uning tarixi bilan qiziqqan har bir sayyoh ko‘rishi kerak bo‘lgan qadamjo ekani ta’kidlanadi.

“Ammo barcha madaniy ob’yektlar ham asl holida saqlanib qolmagan. Ularni qayta tiklash masalasi tashrif buyuruvchilar, mahalliy aholi, olimlar va xalqaro tashkilotlar o‘rtasida ko‘plab bahs-munozaralarga sabab bo‘lgan”, – deya yozadi jurnal.

Ba’zilar ushbu obyektlarni himoya qilish va turizmdan muhim daromad olish uchun ta’mirlash zarur desa, boshqalar ehtiyotsiz qilingan restavrasiya bilan obidalardagi asliyatga putur yetkazishi, shuningdek, shahardagi tarixiy muhitning buzilayotgani haqida xavotirlarini bildirishgan.

National Geographic jurnali restavrasiyasiz O‘zbekiston tarixi abadiy yo‘qolib ketishi mumkin edi degan fikrni bildirgan.

Respublika hukumati diqqatga sazovor joylarni muhofaza qilish va asrab-avaylash masalalarida YUNESKO bilan faol hamkorlik qilmoqda.

Avvalroq, O‘zbekiston 2022-yilda turizm bo‘yicha eng yaxshi TOP-10 taligidan joy olgan edi. Mutaxassislar sayyohlarga tashrif buyurishni tavsiya qilgan joylar qatorida Samarqand ham bor.

Sayyohlarga “Sharq taronalari” xalqaro musiqa festivaliga ham tashrif buyurish tavsiya etilgan.

So‘nggi vaqtlarda Samarqand shahridagi tarixiy muhitning yemirilayotgani va qadimiy mahallalarda nomunosib tarzda zamonaviy ko‘p qavatli “dom”lar qurilayotgani haqida bahs-munozaradar o‘rtaga tashlanayapti.

• Samarqand
• Tarix