Navoiy viloyatidagi “Jongeldi” uran konini o‘zlashtirishning birinchi bosqichida 214 million dollar sarmoya kiritish rejalashtirilgan. Bu haqda “Navoiyuran” davlat korxonasi xabar bermoqda.

Kompaniya ma’lumotlariga ko‘ra, uch yil ichida sanoat uran qazib olish yo‘lga qo‘yiladi va o‘rtacha yillik ishlab chiqarish hajmi 500 tonnani tashkil etadi.

Loyihani amalga oshirish uchun Parijda fransuz kompaniyasi Orano Mining, Yaponiyaning Itochu korporatsiyasi va “Navoiyuran” DK o‘rtasida uch tomonlama bitim imzolandi.

Hujjatda uran ishlab chiqarishni 2025-yil oxirigacha ishga tushirish, shuningdek, boshqa qo‘shma tashabbuslar doirasida geologiya-qidiruv ishlarini faollashtirish nazarda tutilgan.

Shartnoma shartlariga ko‘ra, loyihaning asosiy investorlari xorijiy kompaniyalar bo‘ladi, boshqaruvchi operator esa “Navoiyuran” DK tomonidan tayinlanadi. Bu ishlab chiqarish tannarxini pasaytiradi va jarayonni O‘zbekistonning mavjud ishlab chiqarish infratuzilmasiga integratsiya qiladi.

• Investitsiya
• Navoiy
• Uran