Navoiy viloyati Karmana tumanida suvda cho‘kayotgan 62 yoshli erkak hayoti qutqarib qolindi. Bu haqida viloyat Ichki ishlar boshqarmasi axborot xizmati xabar berdi.

Ma’lum bo‘lishicha, Alisher Navoiy mahallasida istiqomat qiluvchi 62 yoshli A.N. shu mahalladan oqib o‘tuvchi kanalga engashib, ehtiyotsizlik oqibatida muvozanatini yo‘qotib, suvga tushib ketgan.

Uni atrofdagilardan hech kim ko‘rmagan. Fuqaro kanalning qo‘shni Farhod mahallasidagi qismigacha oqib kelgan. Shu payt o‘sha yerda xizmat vazifasini o‘tayotgan katta leytenant hamda mayor tezkorlik bilan uni qutqarib olish choralarini ko‘rgan.

Hushsiz holda suvdan olib chiqilgan A.N.ga profilaktika inspektorlari tomonidan berilgan birinchi tez tibbiy yordam tufayli uning hayoti saqlab qolingan.

• IIB
• Navoiy