Braziliya terma jamoasi tarixida ikkinchi marta jahon chempionati doirasidagi oʻyinning birinchi yarmida toʻrtta gol urdi.

JCh-2022 1/8 finalining birinchi yarmida Janubiy Koreyaga qarshi (4:1), Vinisius Junior, Neymar (penaltidan), Risharlison va Lukas Paqueta gol urishdi.

Bungacha braziliyaliklar 1954-yilgi jahon chempionatida Meksikaga qarshi oʻyinning birinchi boʻlimida toʻrtta gol urishgan, oʻsha uchrashuv 5:0 hisobida yakunlangandi.

Shuningdek, Braziliya terma jamoasi birinchi boʻlib JCh-2022 uchun butun tarkibidan foydalandi.

Bosh murabbiy Tite Qatarga kelgan barcha futbolchilarni turnirga jalb qildi va qaydnomadan joy olgan 26 nafar oʻyinchining barchasini maydonga tushirdi.

Janubiy Koreyaga qarshi 1/8 final uchrashuvida turnirda hali oʻyin amaliyotiga ega boʻlmagan soʻnggi futbolchi, darvozabon Ueyverton maydonga tushdi. U 80-daqiqada Alissonni almashtirdi.

Qayd etish kerakki, terma jamoaning barcha aʼzolari JCh tarixida birinchi marta foydalanilayotgani yoʻq – buni 1994-yilda Gretsiya (22 nafar), 2014-yilda esa Niderlandiya (23 nafar) amalga oshirgan.

Bundan tashqari, Braziliya ketma-ket 8-marta jahon chempionatining chorak finaliga chiqdi. Oxirgi marta braziliyaliklar JCh-1990da bu bosqichga chiqa olmagan. 

Oʻshanda “pentakampeonlar” Argentinadan 1/8 finalda magʻlubiyatga uchrashgan edi.

Oʻshandan beri Braziliya ikki marta jahon chempioni (1994, 2002) va bir marta ikkinchi oʻrinni egallagan (1998) boʻlgan.

Qoʻshimchasiga, Braziliya terma jamoasi soʻnggi 24 yil ichida birinchi marta jahon chempionati pley-off oʻyinida toʻrtta gol urdi.

Oxirgi marta braziliyaliklar 1998-yilda Chili termasi magʻlub etilganda (4:1) nokaut oʻyinlarida 4 ta gol urishgan edi.

• Braziliya
• Futbol
• Jahon chempionati