Davlat rahbari Shayxontohur tumanidagi Markaziy koʻp tarmoqli poliklinikani borib koʻrdi. Bu haqda Prezident matbuot xizmati xabar berdi.

Qayd etilishicha, 1994-yilda qurilgan mazkur shifo maskani 2017-yilda rekonstruksiya qilingan. Bu yerda terapiya, nevrologiya, kardiologiya, revmatologiya, allergologiya, pediatriya, jarrohlik kabi boʻlimlar, tashxis uskunalari mavjud.

Keltirilishicha, ushbu markaziy poliklinika va uning tarkibidagi 9 ta oilaviy poliklinika tumanning 51 ta mahallasida yashovchi 346 ming nafar aholiga xizmat koʻrsatilmoqda.

Prezidentimiz ushbu poliklinikalar negizida tibbiyot klasteri tashkil etish boʻyicha koʻrsatma berdi.

- Zamon talabi shunday: xususiy tibbiyot rivojlanib boraveradi. Aholining bir qismi xususiy klinikalarga boradi. Lekin davlat barcha aholini sifatli tibbiyot bilan qamrab olishi kerak. Shuning uchun bu yerni klasterga aylantirib, davolashni manzilli yoʻlga qoʻyish, samaradorligi va qamrovini oshirish zarur. Odamlar tibbiyotda adolatni sezishi kerak, — dedi Prezident.

Maʼlum qilinishicha, mutasaddilarga shu borada topshiriqlar berilgan.

• Mirziyoyev
• Prezident