Farg‘onada “GAI” xodimi jarima maydoniga olib ketayotgan BYD voyaga yetmagan bola boshqaruvidagi Damas bilan to‘qnashgan. Ushbu YTH oqibatida Damas’ni boshqargan 2007-yilda tug‘ilgan o‘smir shifoxonada vafot etgan.

Surishtiruvlardan so‘ng, YPX inspektori BYD’ni aholi yashash punktida yuqori tezlikda boshqargani aniqlangan. Bosh prokuratura holat yuzasidan jinoyat ishi qo‘zg‘atilganini ma’lum qildi.

Ma’lum qilinishicha, ushbu YTH 30-yanvar kuni sodir bo‘lgan. O‘tkazilayotgan reyd tadbiri davomida 2004-yilda tug‘ilgan fuqaro M.G‘. amakisi Yo.G‘.ga tegishli BYD Song mashinasini tegishli hujjatlarsiz boshqarganligi aniqlangan. Shundan so‘ng, holat yuzasidan ma’muriy bayonnoma rasmiylashtirilib, YPX inspektori R.Q. mashinani jarima maydonchasiga olib ketayotganda 2007-yilda tug‘ilgan voyaga yetmagan X.N. boshqaruvidagi Damas bilan to‘qnashgan. Damas mashinasi bolaning ustozi A.S.ga tegishli bo‘lgan.

YTH oqibatida Damas haydovchisi X.N. tan jarohati olib, ko‘rsatilgan tibbiy muolajalarga qaramasdan shifoxonada vafot etgan.

• BYD
• YTH