New York Times gazetasining rasmiylarga tayanib yozishicha, G‘azo fuqarolari uchun barcha ziyorat vizalari to‘xtatilganini e’lon qilgan AQSh ma’muriyati bu borada yana bir qadam tashlagan.

AQSh Davlat departamenti 18-avgust kuni o‘zining barcha elchixonalariga G‘arbiy Sohil va Falastin diasporasidan kelgan shaxslar uchun immigratsion bo‘lmagan vizani rasmiylashtirishni to‘xtatib qo‘yish haqida buyruq berdi.

Ushbu harakat Falastin vizasi egalariga AQShga davolanish, universitet ta’limi, tashriflar va ish safari kabi maqsadlarda kelish uchun beriladigan vizaga ta’sir qiladi.

AQSh Davlat departamenti 29-avgust kuni Nyu-Yorkda sentyabr oyida Birlashgan Millatlar Tashkiloti (BMT) Bosh Assambleyasining 80-sessiyasida ishtirok etish uchun AQShga kelishi kerak bo‘lgan Falastin rasmiylarining vizalari bekor qilinganini ma’lum qildi.

“AQSh qonunchiligiga muvofiq, Davlat kotibi Marko Rubio yaqinlashib kelayotgan Birlashgan Millatlar Tashkiloti Bosh Assambleyasi oldidan Falastin Ozodlik Tashkiloti va Falastin ma’muriyati a’zolariga viza berishni rad etdi yoki bekor qildi”, — deyiladi xabarda. AQShning bu qarori Falastin tomonida norozilik uyg‘otdi.

AQSh Davlat departamenti 16-avgust kuni G‘azo aholisiga barcha turdagi tashrif vizalari berishni to‘xtatganini e’lon qilgandi.

• AQSh
• Falastin
• Viza