Joriy yil 12-13-may kunlari Prezident Mirziyoyev Farg‘ona viloyatiga tashrif buyurgan va tashrif davomida viloyatning Furqat tumanida faoliyat olib boruvchi “Usta Yusufjon naqqosh” oilaviy korxonasi bilan ham tanishgan edi.

Tashrif rejasiga kiritilgan mazkur obyektdan olib tarqatilgan fotosuratlar ijtimoiy tarmoqlarda bahs-munozaralarga sabab bo‘ldi.

Gap shundaki, tashrif chog‘ida olingan suratda davlat rahbarining orqasida o‘ymakor shogird libosida tuman hokimining haydovchisi turgan. Shuningdek, Prezident bilan muloqot qilgan yana bir usta ham tumandagi 21-maktab direktori o‘rinbosari bo‘lgan.

Mazkur holat yuzasidan Furqat tumani hokimligi munosabat bildirdi.

Hokimlik, haqiqatdan ham, rasmda ko‘zga tashlangan shaxs Furqat tuman hokimining haydovchisi Ilhom Ahmadjonov ekanligini tasdiqlab, u O‘zbekiston xalq ustasi Muhammadali Yunusovning shogirdlaridan biri ekanligiga urg‘u bergan.

“Ilhom Ahmadjonov bir yildan beri Furqat tuman hokimligida haydovchi bo‘lib faoliyat ko‘rsatib keladi. Avvaldan o‘zida o‘ymakorlikka, duradgorlikka qiziqish borligi sabab, tumanga kelgach “Usta Yusufjon naqqosh” oilaviy korxonasida milliy yog‘och o‘ymakorligi sanʼati o‘rganish imkoniyati mavjudligidan foydalanib, shogird sifatida hunar sirlarini o‘rgana boshlagan. Kechagi tashrifda ham korxonada doimiy faoliyat olib borayotgan ustalardan tashqari Hunarmandlar maktabining qator o‘rganuvchilari ham bo‘lishganini eʼtiborga olganda, Ilhom Ahmadjonovning ham ular qatorida u yerda bo‘lishi tabiiy holatdir”, – deyiladi hokimlik munosabatida.

Shuningdek, tuman hokimligi davlat rahbari bilan muloqot qilgan maktab direktori o‘rinbosari Ilhomjon Sulaymonov haqida ham tushuntirish berib, unda Sulaymonovning faoliyati davomida maktabda mehnat fanidan o‘qituvchi bo‘lgani, o‘quvchilarga duradgorlik va o‘ymakorlik bo‘yicha saboq bergani, hozirda tumandagi 21-maktabda maʼnaviy-maʼrifiy ishlar bo‘yicha 0,75 stavkada direktor o‘rinbosar bo‘lib ishlab kelishini aytadi.

Bundan tashqari Sulaymonovning “Usta Yusufjon naqqosh” oilaviy korxonasida tushdan keyin usta-o‘rgatuvchi lavozimida ishlashi va unga 10 nafar shogird biriktirilgani taʼkidlanadi.

• Farg‘ona
• Hokimlik
• Munosabat
• Tashrif